N-Ierland premier uit ná vrou se vryery
2010-01-12 09:15
Anesca Smith
Londen - Noord-Ierland se premier, Peter Robinson, het Maandag tydelik uit sy pos getree in ’n politieke krisis wat spruit uit sy 60-jarige vrou se liefdesverhouding met ’n 21-jarige man.
Robinson, leier van die Democratic Union Party (DUP), het ’n kabinetskollega, Arlene Forster, gevra om minstens vir die volgende ses weke as premier in te staan.
Sy het dié aankondiging Maandag gemaak.
Dit volg nadat die buite-egtelike verhouding tussen Robinson se vrou, Iris, en Kirk McCambley, toe dié 19 jaar oud was, verlede week op die lappe gekom het.
Boonop is onthul dat Iris Robinson haar jong minnaar op onreëlmatige wyse gehelp het om ’n restaurant in die suide van Belfast te open.
Sy het glo ’n lening van £50 000 (sowat R589 000) van twee eiendomsontwikkelaars vir hom verkry en was boonop ’n lid van die plaaslike raad wat toestemming aan hom verleen het om die restaurant te open.
Intussen vind die Ierse publiek die hele skandaal onweerstaanbaar komies, het die Independent Maandag berig.
Die liedjie “Mrs Robinson” deur Simon & Garfunkel is tans een van die gewildste versoeke op radiostasies in Belfast.
Die premier ontken dat hy bewus was van sy vrou se bedrywighede en het teruggestaan uit sy pos in die hoop da ’n onafhanklike ondersoek in die komende weke sy onskuld sal bewys.
Hy word beskuldig dat hy geweet het van die lening en nie hierdie belange verklaar het nie.
Sy vrou, self ’n LP, is intussen die naweek uit die party geskop. Sy ontvang glo psigiatriese hulp ná sy kort nadat die verhouding op die lappe gekom het glo probeer het om selfmoord te pleeg.
Na verneem word, is Westminster ’n ondersteuner van Robinson se premierskap weens sy tegemoetkomende betrekkinge met die linksgesinde Sinn Fein-party.
Die skandaal is verlede week deur die BBC-program Spotlight aan die lig gebring.
- Die Burger