Van skoonmaker tot ’n sersant in net ’n paar dae!
2010-03-11 07:45
Erika Gibson, Beeld
Johannesburg - Sy was begin Desember verlede jaar net ’n skoonmaker vir die weermag in Pretoria, maar enkele dae later het sy met die rang van sersant gespog.
Dié beweerde voorbeeld van “uiters onregverdige bevoordeling” krap haar mede-sersante om.
Nadat Beeld oor dié snelle bevordering van sers. Mmaluka Louisa Florence Mgcina navraag gedoen het, het die weermag gesê genl. Godfrey Ngwenya, weermaghoof, het nou ’n raad van ondersoek na haar aanstelling belê.
Ervare onder-offisiere, wat elke moontlike kursus gedoen het om sersante te word, het gesê gevalle soos dié maak hulle moedeloos oor hul loopbaanmoontlikhede.
Mgcina (38) het in 2007 as skoonmaker teen R3 603 per maand vir die weermag begin werk.
Teen Desember verlede jaar het sy R4 593 per maand verdien, maar toe word sy as lid van die Staande Mag in die pos as “militêre raadgewer” aangestel – sonder enige militêre agtergrond.
Sy verdien nou R10 182 en geniet 100% mediese en ander voordele wat weermaglede kry.
Later vanjaar sal sy ondanks haar ouderdom eers haar basiese opleiding ondergaan.
Volgens die weermag se personeelstelsel moet voornemende soldate tussen 18 en 23 wees.
Die minimum kwalifikasietydperke vir bevordering is dat soldate minstens twee jaar van weerman tot onderkorporaal moet dien; twee jaar van onderkorporaal tot korporaal en drie jaar van korporaal tot sersant.
- Beeld