Twee kinders dood in huis gevind
2010-07-30 20:55
Johannesburg – Die polisie is op soek na die ma van twee jong meisies wat Vrydag dood in hul huis gevind is in Theresa Park in Pretoria.
Die lyke van ‘n vierjarige meisie en haar agt maande oue suster is deur ‘n vriendin van die kinders se ma gevind toe sy hul huis besoek het, het konst. William Mahlaole gesê.
Die ma van die kinders en haar motor kon nêrens gevind word nie.
Die polisie is tans besig om haar te soek.
Volgens Mahlaole lyk dit asof die vierjarige meisie verdrink is, omdat daar water in ‘n bad naby hulle was.
Die polisie vermoed dat die baba met ‘n hoed versmoor is.
Die hoed het nog op haar gesig gelê toe die polisie by die toneel aankom.
Geen sigbare kneusplekke of wonde is aan die kinders opgemerk nie.
Volgens Mahlaole is die vriendin na die huis toe om iets af te lewer.
Sy het gesien dat die huis se deur oop is en het daarna die ma van die kinders geroep.
Toe sy geen antwoord kry nie, het sy die plaaslike sekuriteitsmaatskappy geskakel.
Sy het saam met die sekuriteit die huis deursoek, wat deurmekaar was en ‘n vrot reuk gehad het.
Die ma van die kinders het Donderdag laas met familielede gepraat.
Die polisie vermoed dat die ma by die voorval betrokke is of dat rowers die kinders vermoor en die ma ontvoer het.
Die polisie ondersoek die oorsaak van die kinders se dood.
Die pa van die kinders is in Ferbruarie oorlede.
Volg Nuus24 op Twitter.
- SAPA