Kaalbaskoning los planne vir oord by Orania
2010-06-23 08:11
Jana Engelbrecht, Volksblad
Kimberley – Die mense van Orania kan ontspan.
Beau Brummel, die kaalbaskoning van Suid-Afrika, gaan nie meer in sy geboortepakkie by die dorp paradeer nie.
Brummel het Dinsdag aan Volksblad gesê hy het sy planne om ’n nudiste-kolonie by Orania te vestig, finaal laat vaar.
“Ek wou geld maak met die Wêreldbeker-sokkertoernooi, maar nou is hier omtrent niks mense nie en dis vrek koud.”
Brummel het gesê hy het in sy geestesoog duisende wit kaalbasse in die son sien lê op ’n plaas by Orania.
“Baie Europeërs is nudiste. Hulle loop almal kaal op hul strande rond. Niemand is skaam nie. Ek wou hulle almal bymekaarbring. Dit sou ’n wit nudiste-oord wees vir al die wit Europeërs.”
’n Verligte Brummel sê hy is bly hy het nie geld aan só ’n oord bestee nie.
“Dit sou ’n volskaalse flop wees! Ek sou geld verloor het. Fifa het 600000 sokkerondersteuners van Europa verwag. Hier het slegs 50000 opgedaag. Ons hotelle is leeg.”
Sy nuwe plan vir kaalbasse is om in die Drakensberg ’n nudiste-kamp te begin.
“Ek sal net wag vir die somer. Dit kan sommer ’n geskiedenis-les ook wees. Ek het die perfekte plaas gekry waar die Voortrekkers in die Groot Trek Natal ingegaan het.
“Die plaas het volop wild en is baie mooi. Daar lê sommer ’n paar antieke wiele van ’n ossewa ook rond.”
- Volksblad