Helde-afskeid vir polisielede

Pretoria - ‘Dis my seun. Dis my seun.”

Só het Doris Gouws huilend herhaal toe sy by die roudiens instap vir die sewe polisielede wat verlede week in ’n helikopterongeluk dood is.

Haar seun se foto was die eerste ding wat sy en haar familie gesien het toe hulle by die Hatfield Christian Church inkom.

Hulle het by die foto gaan stilstaan en kon nie hul trane keer nie.

Ao. Thinus Gouws was die medevlieënier van die helikopter waarin die sewe lede van die polisie se nasionale intervensie-eenheid en lugvleuel na ’n rooftog in eMalahleni (Witbank) op pad was.

Dit het in Pine Ridge naby die Klarinet-plakkerskamp neergestort.

Genl. Bheki Cele het die sewe as helde beskryf wat op “Swart Vrydag” dood is.

“Hierdie organisasie (die polisie) sal as beskermer van die weeskinders en as pa vir die weduwees optree. Ons sal na dié gesinne kyk.”

Cele was gister ’n jaar lank in sy pos. Hy het gesê hy wou dit regtig nie so “gevier” het nie.

Nathi Mthethwa, minister van polisie, se woorde was: “Vrydag het Suid-Afrika en die polisiemag armer geword.”

Sowat 2 500 mense, onder wie talle polisie- en weermaglede, het die diens bygewoon.

Ao. Marlise Henning, weduwee van sers. Kobus Henning, het gesê hul sewe weke oue babaseuntjie sal weet watter legende sy pa was.

“Hy was ’n wonderlike man, ’n liefdevolle pa en bo alles ’n ongelooflike polisieman.”

Johan Henning het met trane in sy oë hulde aan sy seun gebring.

“Hy wou nog altyd ’n polisieman gewees het en dit is vir ons as familie die seerste seer om te verwerk.”

Kapt. Wickus Zaayman se pa, Phillip, het gesê al wat sy seun ooit wou doen, was om te vlieg.

“Dit was sy grootste passie in sy lewe. Hy het altyd gesê as hy moet doodgaan, sal hy verkies om in sy vliegtuig dood te gaan en dit het toe gebeur.”

Zaayman jr. sou op 9 Oktober met Janine Croucamp getrou het.

Zaayman was die vlieënier wat Cele en genl. Arno Lamoer, hoof van sigbare polisiëring, na die openingseremonie van WB 2010 geneem het.

Hy was ook een van die helde in die destydse Mosambiekse vloede waar hy ’n kind uit die water gered het.

Kol. Percy Madunda, bevelvoerder van die intervensie-eenheid, was volgens sy vrou, Tholwana, die perfekte pa en eggenoot en het sy drie kinders bitter lief gehad. Die jongste van dié kinders is maar twee maande oud.

Die ander oorledenes is ao. Colin Edward Davids en Dirk van Aswegen en sers. Daniël de Bruin.

In sy huldeblyk het Lamoer gesê: “Hulle is dood op die manier waarop hulle gewerk het, besig om misdaad te beveg.

“Terwyl ons oor die lede se dood rou, is die engele besig om agter die gordyn te jubel.”

Cele se laaste woorde aan sy gestorwe kamerade was: “Gaan rus nou veilig, julle het jul werk goed gedoen, en weet net dat ons almal julle verskriklik gaan mis.”