'Baba het binne ma ontbind'

Linda de Beer

Klerksdorp - Baba Lemeel Booysen van Klerksdorp se kop en arms het tydens geboorte van sy lyfie geskeur omdat hy glo reeds in sy ma se baarmoeder begin ontbind het.

Die bestuur van die Klerksdorp-hospitaal het Maandag volgehou Lemeel was al dood toe Faiza Booysen verlede Maandag begin kraam het. Dit is hoekom sy kop en arms afgekom het terwyl dokters en verpleegpersoneel Booysen met die bevalling bygestaan het, het die hospitaal in reaksie op Beeld se vrae gesê.

Booysen glo haar baba het nog gelewe voordat sy begin kraam het. Die verpleegpersoneel het onder meer aan haar gesê om “te druk, want die baba raak moeg”.

Lemeel het 4,7 kg by geboorte geweeg. ’n Keisersnee is om dié rede vir 18 November geskeduleer. Nogtans het Booysen ’n induksie gekry om haar normaal te laat kraam nadat mediese personeel die Maandag glo bevind het die baba is dood. Dié diagnose was volgens die hospitaal gegrond op ’n sonar, waarna ’n masjien wat die hartklop wys ook aan Booysen gekoppel is. Daar was glo nie ’n hartklop nie.

Die hospitaal het gesê in gevalle waar die fetus in die baarmoeder sterf, is gewone vaginale geboorte die bevallingsmetode van voorkeur. Dit is glo om die vrou die trauma van ’n keisersnee te spaar.

Booysen het gesê dit sou vir haar baie minder traumaties gewees het om ’n keisersnee te kry. Sy was ure lank in kraam terwyl dokters en verpleegpersoneel “in my gewoel en gewoel en getrek en getrek” het.

Volgens die hospitaal het die baba se kop spontaan verskyn, waarna die een skouer in ’n posisie vasgesteek het wat normale geboorte verhoed (shoulder dystorcia). In die proses om die res van die baba te verlos, het die “kop en die agterste arm wat reeds verlos was van die res van die lyf verwyder geraak weens nadoodse weefselverandering”, het die hospitaal gesê. Die weefsel het glo versag omdat dit reeds begin ontbind het.

Lemeel se kop en arms is later weer aangewerk om die dooie fetus “die waardigheid te gee wat dit verdien” en sodat sy familie ’n “volledige lyk” kan begrawe.

Die hospitaal het gesê die baba se dood word nie ondersoek nie omdat die fetus volgens hulle nie meer gelewe het toe Booysen opgeneem is nie. Die mediese personeel het glo die “aanvaarde verloskundige prosedure” gevolg.

Booysen het gesê die hospitaal het nooit aan haar so ’n volledige verduideliking gegee nie.

Sr.supt. Kebaakae Metsi, polisiewoordvoerder in Noordwes, het gesê ’n geregtelike ondersoek na Lemeel se dood word gedoen. Die hospitaal het sy lyk vir ’n lykskouing na Potchefstroom gestuur. Booysen het gesê hulle is ingelig dit word Woensdag gedoen. Die gesin wil Lemeel ook Woensdag begrawe.

- Beeld