Pienaar pak tasse vir Ierland
2010-07-29 10:37
Londen – Die veelsydige Springbok Ruan Pienaar is Woensdag deur die Haaie vrygestel om by die Ierse rugbyklub Ulster, aan die begin van September aan te sluit.
Die 26-jarige is tans deel van die Springbokke se Drienasies-groep maar hy het reeds in Mei vanjaar 'n kontrak geteken om klubrugby vir Ulster te speel.
Pienaar sal hom in Belfast by Johann Muller én Pedrie Wannenburg aansluit.
“Ek is baie opgewonde oor die skuif in my loopbaan en het vir 'n geruime tyd reeds oorweeg om in die Noordelike Halfrond te speel,” het Pienaar gesê.
Pienaar se twee jaar kontrak sal op 1 September begin maar hy sal steeds vir Suid-Afrika mag speel indien hy gekies word vir die Drienasies-toets tussen die Springbokke en Wallabies op 4 September.
Ulster se operasionele direkteur, David Humphreys het gesê, “Ruan is beslis die grootste naam wat Ulster nog op sy boeke kon kry. Ons wil graag die Haaie bedank vir hul bereidwilligheid om hom vroeër van sy kontrak vry te stel."
Bly op hoogte van al die jongste sportnuus deur Nuus24Sport op Twitter te volg.
- Sport24