McCaw erken hy't teen SA oortree
2010-07-29 09:02
In-diepte Verslae
Ondersteuners wat nie kaartjies vir die Drienasies-toets teen Australië het nie, kan lank wag om weer die Springbokke in Bloemfontein in aksie te sien.
Bloemfontein. – Richie McCaw het gister erken hy het verskeie kere in die toetse teen die Springbokke nie volgens die reëlboek gespeel nie, maar dat dít alles deel van rugby is.
Dié All Black-flank en kaptein is in die tweede Drienasies-toets teen die Bokke in Wellington volgens ruggastats.com vyf keer gestraf wat die Suid-Afrikaanse afrigter, Peter de Villiers, en van sy senior spelers rooi laat sien het.
Die Ier Allain Rolland was die skeidsregter wat McCaw nie met ’n geelkaart vir sy spel by die afbreekpunte gestraf het nie en sal op 28 Augustus die fluitjieblaser wees wanneer die Bokke teen die Wallabies op Loftus Versfeld te staan kom.
“Ek het ’n paar foute begaan en daar is ’n aantal kere waaroor ek sal redeneer. Ek dink die belangrikste is dat jy moet weet waarmee jy sal wegkom of nie. Maar ek het ongetwyfeld ’n klompie foute begaan,” het McCaw gesê.
Hy sê solank hy sy span nie onder druk plaas nie, sal hy met sy spel voortgaan.
McCaw het voor Saterdag se Drienasies-toets teen die Wallabies in Melbourne ook erken dat hy in Wellington gelukkig was om nie meer strafskoppe teen die Bokke af te staan nie.
McCaw het gesê hy sal ligloop vir Suid-Afrika se Craig Joubert in eerskomende Saterdag se toets.
McCaw en sy eweknie van die Wallabies, David Pocock, se spel teen die Bokke het nietemin onderstreep dat daar ondanks reëlveranderinge steeds plek vir baljagters soos die Bokke se Heinrich Brüssow in toetsrugby is.
Brüssow behoort volgens die Cheetahs se jongste beseringsverslag beskikbaar te wees om die Bokke op die einde van die jaar se toer na Europa te vergesel.
McCaw erken dat ook Pocock die Bokke baie met sy spel by die afbreekpunte in Brisbane gefrustreer het.
“Hy het ’n groot impak daar (afbreekpunte) gehad. Die Springbokke was ook nie so akkuraat soos hulle graag sou wou wees nie,” het McCaw gesê.
Pocock is volgens ruggastats.com drie keer teen die Bokke gestraf.
Bly op hoogte van al die jongste sportnuus deur Nuus24Sport op Twitter te volg.
- Sport24