Besin oor ‘boorvatte’, vra Jean
2010-07-29 08:29
In-diepte Verslae
Ondersteuners wat nie kaartjies vir die Drienasies-toets teen Australië het nie, kan lank wag om weer die Springbokke in Bloemfontein in aksie te sien.
Kaapstad - Jean de Villiers het Woensdag gewaarsku dat aanvallende spelers strafskoppe gaan begin “melk” as daar ’n oordrewe klem is om die sogenaamde tip tackle uit die spel te roei.
Dié Springbok-agterspeler dien ’n skorsing van twee weke uit vir sy gevaarlike doodvat op die All Black-speler Rene Ranger in die Bokke se onlangse nederlaag van 17-31 in Wellington.
De Villiers se doodvat op Ranger was ’n oortreding van reël 10.4 (j) en is daarom oor dieselfde kam as ’n boorvat geskeer. Beeldmateriaal wys egter duidelik dat De Villiers niks kon gedoen het om Ranger se val te keer nie.
“Ranger het eintlik meer beheer oor die situasie as ek gehad,” sê die Bok.
“Die situasie gaan ontstaan waar die baldraer ’n strafskop kan ‘melk’ deur op ’n sekere manier te val. Daar sal oor dié situasie besin moet word. Jy wil steeds sien dat die fisieke element van rugby behoue bly.”
De Villiers het in sy loopbaan van 60 toetse nog net een geelkaart vir herhaalde oortredings gekry.
Dit het in sy guns getel en sy skorsing van twee weke was een minder as die minimum van drie weke wat deur die Internasionale Rugbyraad (IRR) aanbeveel word.
Dieselfde geld die Wallaby-losskakel, Quade Cooper, wie se appèl teen ’n skorsing van twee weke vir ’n soortgelyke oortreding gister van die hand gewys is.
Cooper sal gevolglik twee Drienasies-toetse teen die All Blacks misloop.
Hoewel De Villiers nie openlik oor sy skorsing brom nie, was hy verbaas dat sy duikslag en Cooper s’n in dieselfde lig beskou is.
Die Nieu-Seelandse regsbeampte Bruce Squire het die vergelyking in sy aanvanklike uitspraak oor Cooper se skorsing getref.
“Die vergelyking met Quade maak my moedeloos, want jy kan duidelik sien dat hy met opset optree,” sê De Villiers.
“My vraag aan die regsbeampte was ‘wat anders moes ek gedoen het?’ Hy kon nie vir my sê nie.
“Hulle het ’n brief van die IRR gekry dat dié soort doodvatte (waar albei ’n teenstander se bene met die uitvoer van die duikslag van die grond af gelig word) uit die weg geruim moet word. Die siening is dat afrigters spelers maar moet leer om die doodvatte op ’n ander manier uit te voer.”
De Villiers (29) erken hy het nie vanjaar goed gevaar vir die Bokke nie. Hy is egter uit posisie op buitesenter en vleuel aangewend.
“Ek het nie gedink ek gaan weer so vinnig betrokke wees nie. Ek is bly oor die kanse, al was dit op vleuel en buitesenter,” sê hy.
“Ek het nie goeie rugby gespeel nie, maar hoop ek kry weer die kans op binnesenter om te wys dat ek goed genoeg is.
“Ek het geweet ek sou weer my plek in die span as binnesenter moet oopveg. As jy die kans gegun word om vir Suid-Afrika te speel, speel jy egter waar jy gekies word.”
Jaque Fourie is weens sy skorsing van vier weke nie beskikbaar vir die Bokke se volgende kragmeting met die All Blacks op 21 Augustus nie.
Dit kan beteken dat De Villiers vir eers weer op buitesenter ingespan word.
“Ek is gemakliker op buitesenter as op vleuel. Dis darem nader aan waar ek wil wees!”
Bly op hoogte van al die jongste sportnuus deur Nuus24Sport op Twitter te volg.
- Sport24