ASA: Chuene het Caster 'uitstekend' hanteer
2009-09-14 07:11
Retha Grobbelaar
Johannesburg - Leonard Chuene, Atletiek Suid-Afrika (ASA) se president, het die omstredenheid rondom Caster Semenya “uitsonderlik goed” hanteer en hy moet aanhou om die land se atlete te verdedig.
Dít was een van die resolusies wat ASA se algemene raad oor die naweek op ’n vergadering in Pretoria aanvaar het.
Molatelo Malehopo, ASA se algemene bestuurder, het gister gesê daar was geen versoek van die algemene raad dat enigiemand, insluitend Chuene, moet bedank nie.
“Die raad was onomwonde in sy ondersteuning,” het hy gesê.
ASA is ook geprys vir die ondersteuning wat hy aan Semenya gegee het.
Die steun vir Chuene en ASA se bestuur volg nadat Makhenkesi Stofile, minister van sport en ontspanning, Vrydag gesê het ASA moet sy rol in die Semenya-sage aan hom verduidelik.
Die DA het gister ook gesê ASA moet sy “onvermoë om die regte van ’n Suid-Afrikaanse atleet te beskerm” aan die portefeuljekomitee vir sport en ontspanning verduidelik.
Die raad eis verder dat die Internasionale Vereniging van Atletiekfederasies (IAAF) verskoning vra aan Semenya, haar familie en die res van Suid-Afrika.
“Die IAAF het versuim om die vertroulikheid wat ’n saak van sulke sensitiwiteit benodig, in ag te neem,” lui ’n resolusie.
’n Wetenskaplike en regspan is ook aangewys om die Semenya-sage verder met die IAAF te bespreek. Chuene moet sy bedanking van die IAAF-raad terugtrek, het die raad gesê.
- Die Burger