Studie: Drink jou maer
2010-03-10 02:03
New York - Ligte tot matige alkoholverbruik, veral rooiwyn, is nie net goed vir 'n vrou se hart nie, maar ook vir haar middellyf, het 'n studie bevind.
Die studie wat in die nuutste uitgawe van Archives of Internal Medicine gepubliseer is, het bevind dat vroue wat alkohol matig verbruik minder gewig optel en se kanse skraler is om gewig op te tel in vergelyking met nie-drinkers.
Die vroue se leefstyle en dieetfaktore is ook in ag geneem.
Sowat 20 000 skraal middeljarige en ouer vroue het aan die studie deelgeneem. Al die vroue was ten minste 39 jaar oud toe die studie begin het.
Dr. Lu Wang van die Brigham- en Vrouehospitaal in Boston, het gesê daar is talle redes hoekom alkohol vroue help om maer te bly.
"Vroue wat meer drink, eet minder. Vroue verbrand ook meer energie ná hulle alkohol gedrink het."
– Archives of Internal Medicine