Fietsryer sterf ná 94.7-fietsren
2009-11-16 21:27
Johannesburg – ‘n Fietsryer is Sondagmiddag aan ‘n hartaanval dood kort nadat hy die Momentum 94.7-fietsren in Johannesburg klaargemaak het.
"Richard Sydney Stevens (55) van Alberton het by die wenstreep ineengestort. Hy is onmiddellik deur paramedici hospitaal toe geneem en noodbehandeling is al die pad soontoe toegepas,” het Primedia Broadcasting Maandag in ‘n verklaring gesê.
“Ten spyte van dokters se pogings het Stevens nie sy bewussyn herwin nie en hy is by die hospitaal dood verklaar. Sy familie was teenwoordig toe dit gebeur het,” het dr. Anchen Laubscher, van Netcare 911 gesê.
Volgens Laubscher was die resies uitdagend en dehidreer baie mense ten spyte daarvan dat hul baie water drink.
‘n Ander deelnemer, ‘n 50-jarige man, is Maandag geopereer vir kopbeserings wat hy tydens die resies opgedoen het toe hy van sy fiets afgeval het.
"Hy is dadelik deur paramedici behandel en is per helikopter na die Milpark-hospitaal geneem. Hy is tans in ‘n kritieke toestand in die waakeenheid,” het Laubscher gesê.
Die organiseerders van die resies het bevestig dat 12 ander deelnemers ook in verskeie hospitale opgeneem is maar dat almal in ‘n stabiele toestand is.
- Sapa